വിഷാദ മധുര മോഹന കാവ്യം

അവിചാരിത സംഘർഷങ്ങളും ആകസികതകളും വേദനകളും ലളിതമല്ലാത്തവിധം മനുഷ്യജീവിതത്തെ സങ്കീർണ്ണമാക്കുന്ന ഈ കാലഘട്ടത്തിൽ വിഷാദം പോലും ഒരു ജീവിതശൈലിയായി രൂപാന്തരപ്പെട്ടിരിക്കുന്നു. ജീവനത്തിൻ്റെ ഒറ്റയടിപ്പാതയിൽ പുണർന്ന മുൾച്ചെടിപ്പോറലുകളേറ്റ ഹൃദയവും പൊള്ളലേറ്റ മാതൃത്വവും പേറി ജീവിക്കുന്ന ഒരുവളിലേക്ക് തീർത്തും അപ്രതീക്ഷിതമായി കടന്നുവരുന്ന കുറച്ച് സ്ത്രീകൾ ആ പെൺ ജീവിതത്തിലുളവാക്കിയ മുദ്രകളാണ് ഇതിൽ മുഴുവനും. ഈ പെൺസാന്നിധ്യങ്ങൾ സമ്മാനിച്ച മുറിവുകളും നിറവുകളും അവഗണനകളും സ്നേഹലാളനങ്ങളും ഹൃദയത്തിൽ വ്രണമായും ഔഷധമായും മാറിയതിൻ്റെ അവശേഷിപ്പാണ് ഈ പുസ്‌തകം.